Wyt Ti'n Teimlo'n Ddiogel Ar-lein?
*Dydd Llun, 31 Mawrth 2014 ydy dy gyfle olaf i lenwi'r holiadur*
Pa mor ofalus wyt ti pan ddaw at ddefnyddio'r rhyngrwyd? Wyt ti'n gwneud yn siŵr bod popeth ti'n ei wneud ar-lein yn cael ei gadw rhyngot ti a dy ffrindiau ta ydy popeth yn agored i bawb weld beth wyt ti'n ei wneud?
Wyt ti'n poeni am fwlio seibyr? Yn poeni am ba mor fregus wyt ti ar-lein?
Wel mae'r rhain yn fath o beth rydym ni eisiau gwybod amdano.
Mae llawer o sôn wedi bod yn y cyfryngau yn ddiweddar am beryglon y rhyngrwyd ac yr angen am ymwybyddiaeth ac addysg e-ddiogelwch gwell yn yr ysgolion, a dyma'n union rydym ni'n ceisio holi amdano.
Mae'r South West Grid for Learning ynghyd â ProMo-Cymru a Phrifysgol Plymouth eisiau darganfod mwy am e-ddiogelwch pobl ifanc yng Nghymru ar ran Llywodraeth Cymru.
Cychwyn hyn fydd arolwg i gael syniad o beth yw'r sefyllfa yng Nghymru. Mae yna dri arolwg wedi cael eu creu. Un i blant a phobl ifanc 0-18 oed; un i rieni ac un i bobl broffesiynol sydd yn gweithio gyda phobl ifanc.
Bydd holl ymatebion yr arolwg yn cael ei gasglu a bydd adroddiad gwerthuso'r dirwedd yn cael ei greu, ac o hyn bydd awgrymiadau yn cael eu gwneud bydd wedyn yn mynd ymlaen i helpu creu cwricwlwm e-ddiogelwch yng Nghymru.
Felly mae dy farn di yn bwysig i ni, gan mai pobl ifanc fel ti fydd yn gallu dweud wrthym ni beth yw'r gwirionedd yng Nghymru a beth sydd wir angen ei wneud er mwyn amddiffyn pobl ifanc fel ti a phobl ifanc y dyfodol. Efallai nad ydwyt ti wedi cael dy effeithio ond yn sicr mae bron iawn i bawb yn adnabod neu wedi clywed am rywun sydd wedi cael eu poeni gan rywbeth sydd wedi digwydd ar y rhyngrwyd.
Arolwg bach iawn ydyw felly ni fydd yn cymryd mwy na phum munud o dy amser ond gallai helpu wneud gwahaniaeth mawr i ddiogelwch pobl ifanc Cymru ar y rhyngrwyd.
I ddarganfod yr holiadur cywir i ti ymwela â'r dudalen hon.
Os wyt ti eisiau gwybod mwy am gadw dy hun yn ddiogel ar-lein yna ymwela â'r dudalen Diogelwch Ar-lein.
Os wyt ti'n poeni am unrhyw beth ac angen siarad gyda rhywun yna gall Meic, y llinell gymorth eiriolaeth, gwybodaeth a chyngor i blant a phobl ifanc Cymru, helpu ti. Gall alw'r llinell gymorth am ddim ar 080880 23456, gyrru neges testun i 84001 neu sgwrsio gyda nhw ar-lein ar www.meiccymru.org. Bydd yr holl wybodaeth ti'n ei roi yn gwbl gyfrinachol.
Delweddt: David Gaz trwy Compfight cc
